دنیا بھر کی طرح جرمنی میں موجود پاکستانی سفارتخانے نے بھی 23 مارچ یوم پاکستان کے موقع پر ایک پروقار تقریب کا اہتمام کیا۔ برلن میں موجود پاکستان ہاوس میں منعقدہ اس پروقار تقریب میں کرونا کی سرکاری پابندیوں کی وجہ سے قوانین کا بھر پور خیال رکھا گیا اور تمام مہمان اور سفارتی عملے سمیت میڈیا کے نمائندگان نے اس تقریب کو تمام تر پابندیوں کا خیال رکھتے ہوئے کامیاب بنایا۔تقریب کا آغاز تلاوت قرآن پاک سے کیا گیا۔ پھر سفیر پاکستان ڈاکٹر محمد فیصل نے اپنی تقریر میں پاکستان کے قیام کے مقاصد اور نظریہ پاکستان کے حوالے سے بھی بات کی۔
بعد ازاں سفارتخانے کے عہدیداران اور میڈیا کی نمائندوں موجودگی میں قومی ترانے کی دھن پر پاکستان پرچم بلند کیا گیا۔ اس موقع پر سفارتخانے میں تعینات اہلکار محمد ظاہر اور سعد بٹ نے صدر پاکستان عارف علوی اور وزیر اعظم عمران خان کے پیغامات پڑھ کر سنائے گئے۔
صدر مملکت اور وزیر اعظم پاکستان نے اپنے اپنے پیغامات میں قوم کو مبارکباد پیش کی اور قائد اعظم محمد علی جناح اور علامہ محمد اقبال کی قیادت کو خراج تحسین پیش کیا۔ انہوں نے پاکستان کو ریاستِ مدینہ کی طرز پر سماجی فلاحی ریاست بنانے کے عزم کا اعادہ کیا۔ انہوں نے بھارتی غیر قانونی مقبوضہ جموں و کشمیر کے عوام سے بھی یکجہتی کا اظہار کیا اور اقوام متحدہ کی قراردادوں کے تحت ان کے حق خودارادیت کی جدوجہد میں ہر ممکن سیاسی ، سفارتی اور اخلاقی مدد فراہم کرنے کے عزم کا اعادہ بھی کیا۔
اپنے پیغام میں ، سفیرِ پاکستان ڈاکٹر محمد فیصل نے برصغیر کے مسلمانوں کی ایک آزاد وطن کے لئے تاریخی جدوجہد کو خراج عقیدت پیش کیا ، جہاں وہ پوری مذہبی ، ثقافتی اور معاشرتی آزادیوں کے ساتھ اپنی زندگی گزار سکتے ہیں۔ انہوں نے شاعر فلسفی ، علامہ محمد اقبال اور قائد اعظم محمد علی جناح کے نظریات اور وژن کی اہمیت پر زور دیا ، جنہوں نے پاکستان کو ایک ترقی پسند ، اعتدال پسند اور جمہوری ملک ہونے کا تصور دیا۔
پاکستان کی ترقی میں بیرون ملک مقیم پاکستانیوں کے کردار کی تعریف کرتے ہوئے سفیر ِ پاکستان نے حکومت کی طرف سے ان کے مسائل حل کرنے کے لئے اٹھائے گئے اقدامات پر روشنی ڈالی۔ انہوں نے جرمنی میں مقیم پاکستانی کمیونٹی کی حوصلہ افزائی کرتے ہوئے انہیں پاکستان کی ترقی اور خوشحالی میں اپنا کردار ادا کرتے رہنے کی تلقین کی۔ انہوں نے اس بات پر زور دیا کہ اس اہم دن پہ ، ہمیں اپنے کشمیری بہنوں اور بھائیوں کو فراموش نہیں کرنا چاہئے۔ تقریب کی مہمان خصوصی کرسٹینا رائل مولر تھیں جن کو اکتوبر 2020 میں ایک بین الاقوامی مقابلے میں حصہ لینے پر سفیر پاکستان نے ایک شیلڈ بھی پیش کی۔
